Giuseppe Vultaggio
NUN CHIAMATIMI PUETA! Nun chiamàtimi pueta… Picchì è scarsa ‘a me valìa; nun chiamatimi pueta… “Padri Danti”…si sfirria! Scrivu versi fatti in rima Ma nun sacciu comu fazzu, nun si ferma la me manu: puru siddu l’amminazzu! Nun chiamàtimi pueta… Un pueta fa puisìa; nun chiamatimi pueta… nun pusseru sta maistrìa! Idda è granni, è supraffina, nun s’avanta, ‘un avi boria; dici sempri cosi veri, nn’arrinfrisca la mimoria. Nun chiamatimi pueta… Propriu no, nun c’è valìa; nun chiamatimi pueta… sta puisia nun è la mia! Chidda è doti naturali, la puisia nesci cunzata, s’ `a dettassi la me menti, fussi malacumminata. Nun chiamàtimi pueta, ascutati sti palori; nun chiamàtimi pueta: lu pueta…è lu me cori!
